Op Woensdag, 20 Julie 2016 is die ‘n besonder goeie Merinodag aangebied in die Philipstown distrik. Ses Merinoklubs het deelgeneem aan die eerste “Interskou kompetisie tussen Jongooiklubs”, naamlik Philipstown, Kraankuil, Middelburg, Noupoort, Britstown en Modern Merino (Hanover, Philipstown, Colesberg).
‘n Vol en interessante program het honderde kuddeboere, stoettelers en belangstellendes gelok. Die dag is amptelike afgeskop deur gasspreker Louis de Beer van Cape Wools, wat ‘n rooskleurige toekoms vir wolprodusente voorspel. Hierna het die ses voorsitters van die jongooiklubs kortliks oor hul klubs gesels. Gawie van Wyk van NWKV het vervolgens elke klub se agt ooitjies beoordeel en deurentyd interessante kommentaar gelewer aan die toeskouers om die ring.
‘n Indrukwekkende uitstalling van topgehalte ramme deur dertien stoettelers het baie aandag geniet. Van hierdie ramme sal tydens die Nasionale Merinoveiling te Grootfontein op 12 Augustus te koop aangebied word.
Lorraine Fourie van Philipstown by haar weefraam, was een van die uitstallers
Skougangers kon tussendeur die verskeidenheid verkoopstalletjies besoek. Le Roux van Vuuren van Kokkedoorfaam het ‘n kosdemonstrasie aan ‘n groot gehoor, hoofsaaklik dames, aangebied. Daar was ook ‘n verskeidenheid eet-, drink- en soetgoed te koop aangebied, wat goed ondersteun is.
Na die beoordeling van die ooitjies het Guillaume Strydom ‘n skeerdemonstrasie gelewer en dr Frans Jooste (GeneCo, Philipstown) het ‘n insiggewende praatjie oor skaapbestuur en reproduksie gelewer.
Louis de Beer van Cape Wools praat oor die wolbedryf.
Gawie van Wyk (NWKV) verduidelik die meriete van elke jongooitjie tydens beoordeling.
Merino SA wens graag vir Diederick Vermeulen en sy span entoesiastiese helpers wat hierdie uitstekende Merinodag gereel het baie geluk.
Indrukwekkende ramme is uitgetal deur 13 stoettelers
Die wengroep ooitjies van Modern Merino met Gawie van Wyk
Merinosake word gesels deur (van links) JP en Stephanus van den Heever, Corne Nel, Oubaas van Heerden, Pikkie vd Heever en Bennie Steyn